HƏMAS-ın Şəhid İsmayıl Həniyənin ikinci ildönümü münasibətilə bəyanatı

Bu gün müqavimət yolunu özünün və övladlarının şəhadəti ilə əbədiləşdirən lider İsmayıl Həniyənin şəhadətinin ikinci ildönümüdür.
Bu gün – 31 iyul 2026-cı il, cümə – HƏMAS-ın Siyasi Bürosunun sabiq sədri İsmayıl Həniyə (Əbu əl-Əbd)-in şəhadətinin ikinci ildönümüdür. Fələstinli lider iki il əvvəl Tehrandakı iqamətgahında sionist rejimin həyata keçirdiyi terror əməliyyatı nəticəsində şəhid olmuşdu.
İslam Müqavimət Hərəkatı (HƏMAS) bu münasibətlə yaydığı bəyanatda şəhid Həniyəni "böyük milli lider və ümmətin şəhidi" adlandıraraq vurğulayıb ki, o, ömrünün son anınadək öz prinsiplərinə sadiq qalıb və Fələstin xalqı ilə birlikdə müqavimət cəbhəsində yer alıb.

Əş-Şati qaçqın düşərgəsindən Siyasi Büro rəhbərliyinə
İsmayıl Həniyə 1962-ci ildə Qəzza şəhərinin qərbində yerləşən Əş-Şati qaçqın düşərgəsində fələstinli köçkün ailəsində dünyaya gəlib. Onun ailəsi 1948-ci ildə Əsqəlan bölgəsində yerləşən Əl-Curə kəndinin işğalından sonra Qəzzaya sığınmışdı.
Həniyə gənclik illərindən tələbə və islami fəaliyyətlərə qoşulmuş, 1987-ci ildə HƏMAS yaradıldıqdan sonra hərəkatın sıralarında fəaliyyətə başlamışdı.
O, bir neçə dəfə sionist rejim tərəfindən həbs olunmuş, 1992-ci ildə isə HƏMAS və İslami Cihad hərəkatının yüzlərlə üzvü ilə birlikdə Livanın cənubundakı Mərc əz-Zühur bölgəsinə sürgün edilmişdi. HƏMAS-ın banisi şəhid Şeyx Əhməd Yasin azad edildikdən sonra Həniyə onun ən yaxın silahdaşlarından biri və ofisinin rəhbəri olmuşdu.
HƏMAS-ın 2006-cı ildə Fələstin Qanunvericilik Şurasına keçirilən seçkilərdə qələbə qazanmasından sonra Həniyə hökuməti formalaşdırmaqla vəzifələndirildi və Fələstin hökumətinin başçısı oldu.
2017-ci ilin may ayında HƏMAS-ın Siyasi Bürosunun rəhbəri seçilən Həniyə, 2021-ci ildə bu vəzifəyə yenidən seçildi. O, siyasi və regional əlaqələri idarə etməklə yanaşı, daim Fələstin qrupları arasında milli birliyin möhkəmləndirilməsinə və daxili ixtilafların aradan qaldırılmasına çağırış edirdi.

Oğullarının və nəvələrinin şəhadəti – müqavimətin ağır bədəli
Həniyənin ailə həyatı da müqavimətin ağır bədəlləri ilə müşayiət olunurdu. Qəzza müharibəsi zamanı onun ailəsinin bir sıra üzvləri sionist rejimin hücumlarında həlak olmuşdular.
2023-cü ilin noyabrında nəvələrindən biri, bir neçə gün sonra isə digər nəvəsi şəhid oldu. 10 aprel 2024-cü ildə isə onun üç oğlu – Hazim, Əmir və Məhəmməd – öz övladlarından bəziləri ilə birlikdə Əş-Şati düşərgəsində avtomobillərinə edilən hava hücumu nəticəsində şəhid oldular.
Bu hadisədən sonra Həniyə bildirmişdi:
"Övladlarımın qanı digər fələstinli uşaqların və ailələrin qanından daha qiymətli deyil."
O əlavə etmişdi ki, bu terror aktları HƏMAS-ı öz mövqeyindən geri çəkilməyə məcbur etməyəcək.

Tehranda terror, Dohada dəfn
Həniyənin Tehranda terrora məruz qalması Fələstin, ərəb və beynəlxalq səviyyədə geniş reaksiyalara səbəb oldu. Fələstin qrupları bu hadisəni "müharibəni genişləndirmək və atəşkəs danışıqlarını pozmaq məqsədi daşıyan addım" kimi qiymətləndirdilər.
Onun nəşi əvvəlcə Tehranda rəsmi və xalqın iştirakı ilə keçirilən mərasimdə yola salındı, daha sonra Qətərin paytaxtı Doha şəhərinə aparıldı və cənazə namazından sonra Lusail qəbiristanlığında dəfn edildi.

Yol davam edir – Xəlil əl-Həyyənin seçilməsi
Həniyənin şəhadətindən iki il sonra HƏMAS Xəlil əl-Həyyənin Siyasi Büro rəhbəri seçilməsi ilə rəhbərlikdə keçid prosesini davam etdirib. Hərəkat bunu öz şura əsaslı idarəetmə sisteminin davamlılığının və rəhbərlərinin terrora məruz qalmasına baxmayaraq fəaliyyətini davam etdirmək qabiliyyətinin göstəricisi kimi qiymətləndirir.
Fələstin qrupları şəhadətin ikinci ildönümündə bir daha İsmayıl Həniyənin yoluna sadiq olduqlarını bəyan edərək, Fələstinin azadlığı uğrunda mübarizənin davam etdiriləcəyini vurğulayıblar. Onların fikrincə, milli birlik və müqavimət Fələstin xalqının hədəflərinə çatmasının ən qısa yoludur.