Budapeştdə Fələstinə dəstək nümayişi keçirilib

Dünən, cümə günü Macarıstanın paytaxtı Budapeşt Fələstinə dəstək nümayişinə ev sahibliyi edib. Aksiya Macarıstanda yaşayan Fələstinlilər İcması tərəfindən təşkil olunub.
Nümayişçilər İsrail qüvvələri tərəfindən həbs edilən fələstinlilərlə, o cümlədən Qəzzadakı Kamal Advan xəstəxanasının həkimi və direktoru Hüseyn Əbu Safiyə ilə həmrəylik nümayiş etdiriblər. Əbu Safiyə 27 dekabr 2024-cü ildə İsrail qüvvələri tərəfindən həbs edilib.
Etirazçılar, həmçinin Fələstinin azadlığına və Yaxın Şərqdə həqiqi sülhün bərqərar olmasına çağırıblar.
Nümayiş iştirakçılarından biri İsrailin beynəlxalq səviyyədə təcrid olunmasını tələb edib. Digər etirazçı isə Macarıstanın İsrail rejimi ilə münasibətlərini davam etdirməsinə nə üçün şərait yaradıldığını soruşub.