Niyə “Tufanul-Əqsa” əməliyyatı Fələstin müqavimətinin dönüş nöqtəsinə çevrildi?

Fələstin–Pakistan İnstitutunun baş katibi Dr. Saber Əbu Məryəm izah edir ki, bu uğurlu əməliyyat İsrailin hərbi və kəşfiyyat gücünü necə iflasa uğratdı, Qəzza xalqının müqavimətə inamını necə möhkəmləndirdi və Fələstin məsələsini yenidən dünya gündəminin mərkəzinə gətirdi.

“İslam Times”ın məlumatına görə, Fələstin məsələsi artıq yetmiş ildən çoxdur ki, Qərbi Asiya və Şimali Afrikanın gərginlik və dəyişikliklərinin mərkəzində dayanır və regional, həmçinin qlobal güc balansında həlledici rol oynayır.
Fələstin xalqının işğala qarşı dirənişi və haqqını geri almaq səyləri təkcə region xalqları üçün ilham mənbəyi deyil, həm də beynəlxalq siyasət, ittifaqlar və reaksiyalar üzərində dərin təsir buraxır.
Bu müsahibə, müqavimətin tarixi, strateji və insani tərəflərini, həmçinin onun dönüş nöqtəsi olan “Tufanul-Əqsa” əməliyyatını dərin təhlil etmək məqsədi daşıyır.

Dr. Saber Əbu Məryəm bildirib ki, Fələstin xalqı 70 ildən artıqdır sionist işğalı altında yaşayır; insanlar evlərindən qovulub, zorla torpaqlarından çıxarılıblar. Xaricdən gətirilmiş sionistlər bu ərazilərdə yerləşdirildi və bununla Fələstin işğal olundu.
Zaman keçdikcə sionist cinayətləri artdı və bu günə qədər davam edir: qırğınlar, məcburi köçürmələr, ardıcıl qəsəbə salmaları və kütləvi həbslər bu siyasətin əsas elementləridir.

Baş katibin sözlərinə görə, Fələstin xaricində, ərəb dünyasında bəzi ölkələr sionist rejimi tanımağa hazırlaşırdı – “Tufanul-Əqsa” əməliyyatından əvvəl. Xəbərlərə görə, Səudiyyə Ərəbistanı kimi ölkələr İsraili tanımaq üçün hazırlıq mərhələsində idi. Hətta bəzi ərəb ölkələrinin dərsliklərindən “Fələstin məsələsi” çıxarılır, onun yerinə “İsraillə dostluq və ortaq maraqlar” kimi mövzular əlavə edilirdi. Bu planın məqsədi Fələstin məsələsini bir neçə il ərzində tamamilə unutdurmaq idi.

Əbu Məryəm vurğulayıb ki, sionist layihəsi Fələstin məsələsini tamamilə məhv edib tarixdən silmək məqsədilə sürətlə irəliləyirdi.
Ancaq 78 ildir azadlıq uğrunda mübarizə aparan Fələstin xalqı bilirdi ki, azadlıq qansız və fədakarlıq olmadan əldə edilmir. Belə bir vəziyyətdə yalnız bir yol qalırdı: müqavimətin davamı və İsraili sarsıdacaq böyük bir əməliyyat keçirmək.

O qeyd edib ki, bütün bu amillər Fələstin xalqını və müqavimət qüvvələrini – xüsusilə Həmas və İslami Cihad təşkilatlarını – “Tufanul-Əqsa” kimi genişmiqyaslı əməliyyata sövq etdi. Əməliyyat başladıqda, İsrailin “5 dəqiqəyə cavab verəcəyik” iddiası puça çıxdı – dörd saat ərzində sionist ordusu fələstinli döyüşçülərin zərbələri altında qaldı. Bu, İsrail tarixinin ən böyük hərbi məğlubiyyəti idi.

Dr. Əbu Məryəm xatırladıb ki, “Tufanul-Əqsa” əməliyyatı İsrailə silinməz zərbə vurdu, onun “qorxulu” imicini dağıtdı, kəşfiyyat sistemini ifşa etdi və hərbi zəifliyini ortaya qoydu.
Müqavimət qüvvələri gizli “8200” bölməsinə dair mühüm sənədləri ələ keçirdi, çoxlu sayda sionist əsgəri əsir aldı və bir çoxlarını mühüm mövqelərdən geri çəkilməyə məcbur etdi. Bütün bu səhnələr video şəklində dünyaya yayıldı.
Onun sözlərinə görə, əməliyyatdan sonra müqavimət qüvvələri əsirlərin bir qismini öz tələblərini qəbul etdirməklə azad etdi – bu, İsrailin təkəbbürünü sındıran mühüm nailiyyət idi.
Dünyada da Fələstin naminə yeni bir oyanış başladı; ABŞ və Avropa şəhərləri İsrail və ABŞ-a qarşı etirazlarla doldu. Bu, əsl “Tufanul-Əqsa” idi – region və dünya güc balansını dəyişən tufan.

Baş katib əlavə edib ki, Qəzza xalqının qəhrəmanlıq və səbir nümunəsi tarixdə misilsizdir.
Onlar azadlıq və vətən uğrunda böyük fədakarlıqlar etdilər, iki il davamlı bombardman altında qaldılar, evlərini itirdilər, amma müqavimətə qarşı bircə şikayət də etmədilər. Bu, Qəzzada müqavimət ruhunu daha da möhkəmləndirdi və xalqın Həmas və İslami Cihada tam etimadını gücləndirdi.

O əlavə edib ki, Livan Hizbullahı əməliyyatdan sonra işğalçı qüvvələrə qarşı mübarizədə həlledici rol oynadı.
İsrail ordusu Livan sərhədi boyunca 120 km-lik zolaqda döyüşlərə cəlb edildi ki, Qəzzaya dəstək verilsin. Hizbullah böyük itkilər verdi və bir sıra rəhbərlər, o cümlədən baş katib Seyid Həsən Nəsrullah, şəhid oldu. Bu, təkcə Hizbullah üçün deyil, bütün Müqavimət OXU və bəşəriyyət üçün ağır itkidir, amma hərəkət dayanmadı.

O, Yəməndəki müqavimətin də rolunu önə çəkib:
Ansurallah və Yəmən ordusu 2200 km məsafəyə baxmayaraq, Qəzzaya əməli dəstək göstərdi. Yəmən raketləri Təl-Əviv və Eylatı hədəfə aldı, İsrailin Qırmızı dənizdəki və Ərəb dənizindəki gəmilərinin hərəkətini pozdu. Bu, İsrailə böyük iqtisadi zərbə vurdu.

Dr. Əbu Məryəm qeyd edib ki, İraqda “Haşd əş-Şəbi” və digər müqavimət qüvvələri İsrailə qarşı əməliyyatlar keçirib və Qəzzaya təzyiqi azaldıblar.
İran isə, Müqavimət OXU-nun əsas dayağı kimi, İsrail hücumlarına güclü cavab verib.
Son 12 günün döyüşlərində İran ciddi zərbələr endirib, şəhidlər verib, amma hələ də Fələstinin ön cəbhəsində dayanır.

O vurğulayıb ki, İsrailin kəşfiyyat orqanlarının iflası bu rejimin ən böyük uğursuzluqlarından biridir.
Mossad və Şabak “Tufanul-Əqsa” barədə heç bir məlumat ala bilmədi. Əsir mübadilələri də göstərdi ki, İsrailin informasiya sistemi tam çöküb.
İran, Yəmən, Livan və Qəzzadan atılan raketlər “Dəmir Qübbə” sisteminin qeyri-effektivliyini üzə çıxardı.
Merkava tanklarının məhv edilməsi və Qəzzadakı fədai əməliyyatlar İsrail ordusunun “güclü” imicini tam ifşa etdi.
Əslində, bu ordu yalnız qadın və uşaqları öldürməkdə mahirdir.
Əbu Məryəm sonda bildirib ki, Qərbi Asiya və Şimali Afrikanın gələcəyi Fələstinin taleyindən asılıdır.
Əgər İsrail Fələstini tam işğal etsə, növbəti hədəfi digər region ölkələri – Küveyt, Bəhreyn, Səudiyyə Ərəbistanı, Misir, Türkiyə və hətta Əfqanıstan olacaq.
Bu, “Böyük İsrail” planının tərkib hissəsidir, amma müqavimət bu xəyalı dağıtdı və ABŞ-ın “Yeni Yaxın Şərq” layihəsinin qarşısını aldı.
O əlavə edib ki, bəzi ərəb ölkələri ABŞ-a güvənərək və milyardlarla dollar ödəyərək böyük strateji səhv etdilər.
İndi onlar İsrailin simvolik hücumlarına belə açıq vəziyyətdədirlər.
“Tufanul-Əqsa” əməliyyatından öncəki vəziyyətə qayıtmaq və “İbrahim anlaşmalarını” möhkəmləndirmək cəhdləri Fələstin müqavimətinə toqquşur və bu, həmin ölkələr üçün ağır nəticələr doğura bilər.

Müsahibə aparan: Məsumə Füruzan