Nigeriya ordusunun Benində çevrilişçilərə hava hücumu

Nigeriya ordusu bazar günü Beninin qanuni hökumətinə dəstək olaraq paytaxtda çevrilişçilərin mövqelərini hava zərbələri ilə hədəfə alıb. Frans Press-in Nigeriya Hərbi Hava Qüvvələrinin sözçüsünə istinadən yaydığı məlumata əsasən, bu əməliyyat Qərbi Afrika Dövlətlərinin İqtisadi Birliyi (ECOWAS / EkoVAS) çərçivəsində və “regional hazır qüvvələrlə” koordinasiya şəraitində yerinə yetirilib.
Polkovnik Ehimen Ejodamen əməliyyatı təsdiqləyərək bildirib ki, Nigeriya Hərbi Hava Qüvvələri “Beninin qanuni hökumətinin rəsmi müraciəti və icazəsi əsasında” hərəkət edib, lakin zərbələrin dəqiq hədəfləri barədə əlavə məlumat verməyib.
Benin şimalda Burkina-Faso və Niger, qərbdə Toqo, şərqdə Nigeriya ilə həmsərhəddir və cənubdan Atlantik okeanına çıxışı var. Rəsmi adı Benin Respublikası olan bu ölkə Qərbi Afrikada yerləşir və keçmişdə Fransa müstəmləkəsi olub; 1960-cı illərdə müstəqilliyini əldə edib. Buna baxmayaraq, Fransa hələ də bu ölkəyə təsirini qorumağa çalışır.
Qaçmağa çalışarkən çevrilişçilərin hədəf alınması
Nigeriya xəbər saytı Makama Newsun məlumatına görə, hava hücumu çevrilişçilərin paytaxt Kotonudan zirehli maşınlarla qaçmağa çalışdıqları anda həyata keçirilib. Yerli mənbələr şəhərin müxtəlif bölgələrində bir neçə partlayış səsinin eşidildiyini bildiriblər.
Benin: Çevriliş boşa çıxarıldı və nəzarət hökumətin əlindədir
Benin hökuməti daha əvvəl bildirmişdi ki, ölkənin təhlükəsizlik qüvvələri bazar günü səhər bir qrup hərbçi tərəfindən başlanmış çevriliş cəhdini zərərsizləşdiriblər. Əməliyyat yatırılmadan əvvəl çevrilişçilər dövlət televiziyası vasitəsilə prezident Patriss Talonun hakimiyyətdən kənarlaşdırıldığını elan etmişdilər.
Üsyançı qrupun bir neçə üzvü həbs edilib və hökumət “vəziyyətə tam nəzarət” etdiyini vurğulayıb.
Nigeriyanın müdaxiləsi EkoVAS-ın Qərbi Afrikada çevriliş dalğasının genişlənməsinin qarşısını almaq üçün yeni yanaşmasını göstərir; son illərdə Mali, Niger, Qvineya və Burkina-Faso da bu çevriliş dalğasından təsirlənmişdi.
EkoVAS dəfələrlə xəbərdarlıq edib ki, qeyri-qanuni hakimiyyət dəyişikliyi regionun sabitliyi üçün ciddi təhdiddir və zəruri hallarda seçilmiş hökumətləri müdafiə etmək üçün hərbi variantdan istifadə ediləcək.