Ben-Qvirin Əl-Əqsa məscidinin hər nöqtəsinə hücumuna “icazə verildi”

“Misilsiz addım” kimi qiymətləndirilən bu hadisədə, sionist ravvin Dov Lior — “Otzma Yehudit” partiyasının dini rəhbəri — elə bir fətva verib ki, buna əsasən ifratçı daxili təhlükəsizlik naziri İtamar Ben-Qvirə “Əl-Əqsa məscidi həyətinin daxilindəki hər yerə”, o cümlədən “Qübbətüs-Səxrə məscidinə və Müsəllaya (Qibli məscidinə)” basqın etməyə icazə verilir.
İvrit dilli “Kanal 7” bildirib ki, bu fətva hazırda yalnız Ben-Qvir üçün xüsusi şəkildə verilib və məqsəd bu müqəddəs məkana “nəzarətin sübut edilməsi” kimi göstərilib.
Digər tərəfdən, “Zaman Israel” elektron qəzeti vurğulayıb ki, bu fətva “Əl-Əqsa məscidində mövcud status-kvonun qorunmasına dair bütün bəyanatları nəzərə almır” və bu məsələ ilə bağlı İordaniya ilə mövcud anlaşmaların “açıq pozuntusu” hesab olunur.
Qəzet həmçinin qeyd edib ki, bu fətvanın verilməsi gələn həftə Qüdsdə keçiriləcək “Qırmızı İnək Konfransı”na hazırlıqlarla eyni vaxta təsadüf edir. Həmin konfransda “inəyin yandırılması və onun külü ilə Bəni-İsrailin təmizlənməsi üçün lazım olan şərtlərin mümkünlüyü” məsələsi, “Əl-Əqsa məscidinin yerində üçüncü məbədin tikintisinə başlanılması” üçün ilkin addım kimi müzakirə olunacaq.