Fələstin tərəfdarı aksiyaların qadağan edilməsi Britaniya hökumətinin gündəmindədir

Bu gün yayımlanan müsahibəsində Starmer Fələstin tərəfdarı yürüşlərdə daha sərt dil məhdudiyyətlərinin tətbiqini dəstəkləyib və bildirib ki, bəzi hallarda toplantılar tamamilə qadağan oluna bilər.
O, hökumətinin bir müddətdir mümkün əlavə tədbirlər barədə polis ilə danışıqlar apardığını açıqlayıb və bəzi aksiyaların tam qadağan edilməsinə çalışıb-çalışmadığı barədə suala cavabında deyib ki, müəyyən hallarda bunu uyğun hesab edir.
Starmer daha əvvəl də “intifadanın qloballaşdırılması” şüarını “ifrat irqçilik” nümunəsi adlandırmış və bu ifadədən istifadə edənlərin cinayət təqibinə məruz qalmalı olduğunu bildirmişdi.
London polis komissarı ser Mark Rouli də BBC-yə deyib ki, bu ifadədən istifadə edən şəxslər “böyük ehtimalla həbs olunacaqlar”.
Britaniya rəsmiləri İsrailin Qəzzada həyata keçirdiyi soyqırım dövründə dəfələrlə Fələstin tərəfdarı fəaliyyətləri yatırmağa çalışıblar ki, bu da insan haqları fəallarının tənqidinə səbəb olub.
Keçən ay Britaniya polisi London mərkəzində “Palestine Action” qrupunun fəaliyyətinə qoyulan qadağaya etiraz olaraq keçirilən böyük aksiyada 500-dən çox şəxsi saxlayıb.
Bu aksiyada iştirak edən etirazçılardan biri “Əl-Cəzirə”yə deyib: “Düşünürəm ki, Britaniya indi qeyri-demokratik vəziyyətə yuvarlanıb və bu, ifadə azadlığı üçün çox təhlükəlidir.”