BƏƏ 15 min şiə pakistanlı fəhlə və texniki işçini ölkədən çıxardı

“Mirat əl-Cəzirə” xəbər saytı bildirib ki, ABŞ və İsrailin İran İslam Respublikasına qarşı müharibəsindən sonra BƏƏ rəsmiləri 15 min pakistanlı fəhlə və texniki işçini deportasiya ediblər.
Saytın məlumatına görə, bu şəxslər qısa müddət ərzində saxlanıldıqdan sonra, onlara ittiham bildirilmədən və hüquqi statuslarını müəyyənləşdirmək üçün imkan verilmədən BƏƏ-dən çıxarılıblar.
Məlumata əsasən, saxlanmalar iş yerlərində və ya təhlükəsizlik çağırışları vasitəsilə həyata keçirilib; daha sonra saxlanılanlar müxtəlif təcridxanalara köçürülüb və sonda onların sürətli şəkildə ölkədən çıxarılması üçün xüsusi mərkəzlərə aparılıblar.
Xəbər mənbələri bildirir ki, deportasiya edilənlər arasında illərlə BƏƏ-də yaşamış əməkdaşlar və mütəxəssislər də olub. Bu isə o deməkdir ki, deportasiya olunan şəxslər BƏƏ-dəki əmlaklarına da çıxış əldə edə bilmirlər.
“Mirat əl-Cəzirə” bu şəxslərin şiə olmalarını deportasiyanın əsas səbəbi kimi göstərib və əlavə edib ki, sorğu-sual edilən şəxslər bildiriblər ki, müstəntiqlər onlara şiə məzhəbi ilə bağlı suallar veriblər.
Deportasiya olunan gənclərdən biri deyib ki, o, informasiya texnologiyaları sahəsində çalışırmış. Onun sözlərinə görə, polis idarəsinə çağırıldıqdan və bir neçə saat saxlanıldıqdan sonra, bir neçə nəfərlə birlikdə avtomobillə təcridxanaya aparılıb və daha sonra deportasiya edilib.
Deportasiya olunan şəxslər saxlanma şəraitindən, o cümlədən qida çatışmazlığı, sərt yoxlamalar və ciddi məhdudiyyətlərdən şikayət edərək vurğulayıblar ki, evlərinə qayıdıb əşyalarını toplamaq imkanı verilmədən ölkəni tərk etməyə məcbur olublar və əmlakları BƏƏ-də qalıb.