Tunisin “Ən-Nəhzət” Hərəkatının liderinə ömürlük həbs cəzası

Əl-Qənuşiyə qarşı çıxarılan məhkəmə hökmlərinin davamı olaraq, Tunis məhkəməsi onu ömürlük həbsə məhkum edib.
2023-cü ildən və Prezident Kais Saied-in hakimiyyətə gəlməsindən sonra Tunisdə “Ən-Nəhzət” Hərəkatının liderinə qarşı məhkəmə prosesləri daha da intensivləşib. Son illərdə o, müxtəlif işlər üzrə bir il və üç il müddətinə azadlıqdan məhrumetmə cəzaları alıb.
Məhkəmə mənbəsinin Tunis Dövlət Xəbər Agentliyinə verdiyi məlumata görə, Tunis Birinci İnstansiya Məhkəməsinin terrorizm işlərinə baxan cinayət palatası bu iş üzrə 10 il həbsdən ömürlük həbsədək müxtəlif hökmlər çıxarıb.
Mənbənin sözlərinə görə, iş üzrə bir neçə təqsirləndirilən şəxs var və onlar “terrorçu” təşkilat yaratmaq və ona qoşulmaq da daxil olmaqla müxtəlif ittihamlar üzrə məhkum ediliblər.
84 yaşlı əl-Qənuşi 2023-cü ilin aprel ayından həbsdədir. O, ömürlük həbs cəzası ilə yanaşı əlavə 30 il həbs cəzasına da məhkum olunub. Onun müavini Əli əl-Ərid isə 42 il həbs cəzası alıb.
Məhkəmə həmçinin Tunisin keçmiş təhlükəsizlik rəsmisi Mustafa Xidr də daxil olmaqla bir neçə digər təqsirləndirilən şəxsi ömürlük həbs və əlavə 96 il həbs cəzasına məhkum edib. Digər şəxslərə isə 10 ildən 50 ilədək həbs cəzaları verilib.
35 təqsirləndirilən şəxsin yer aldığı bu iş 2022-ci ilin əvvəlində baş prokurorun, eləcə də 2013-cü ildə qətlə yetirilmiş siyasətçilər Şükri Bəlaid və Məhəmməd Brahiminin vəkillərinin şikayəti əsasında başlanıb.
“Ən-Nəhzət” Hərəkatı dəfələrlə gizli strukturun mövcudluğu ilə bağlı iddiaları rədd edərək, hərəkat rəhbərlərinə qarşı görülən tədbirlərin siyasi motivlərlə həyata keçirildiyini bəyan edib.