Liviyada etirazlar güclənir, Prezident Şurası və Parlamentin binaları bağlanıb

Etirazçılar Tripolinin Ən-Nofliyin bölgəsində yerləşən Prezident Şurasının qərargahını və Əz-Zaviyə əd-Dəhməni bölgəsində yerləşən Parlament binasını bağlayaraq etirazlarını yenidən daha da genişləndiriblər.

RT telekanalının məlumatına görə, bu addımlar Tripolidə beş nazirlik və bir dövlət qurumunun, o cümlədən Əz-Zaviyə əd-Dəhməni bölgəsində yerləşən Xarici İşlər Nazirliyinin, Dəniz Sərvətləri Nazirliyinin, Planlaşdırma Nazirliyinin, Kənd Təsərrüfatı Nazirliyinin və Korrupsiyaya Qarşı Mübarizə Qurumunun bağlanmasından cəmi bir gün sonra atılıb.

Bundan əvvəl də Xarici İşlər Nazirliyinin əsas binası, Gənclər Nazirliyi və Yerli İdarəetmə Nazirliyi fəaliyyətini dayandırmışdı. Həmçinin bir sıra neft şirkətlərinin ofisləri, o cümlədən Neft və Qaz Şirkətinin Baş İdarəsi və Əz-Zuveytinə Neft Şirkətinin Baş İdarəsi bağlanmışdı. Bundan əlavə, dövlət elektrik şirkətinə bağlı Tripoli Regional Nəzarət İdarəsi və Mülki Aviasiya Təşkilatı da fəaliyyətini dayandıran qurumlar sırasına qoşulub.

Liviya paytaxtı Tripoli artıq bir neçə gündür davam edən və getdikcə genişlənən etirazlara səhnə olur. Etirazların əhatə dairəsi dövlət qurumları, neft sektoru və xidmət sahələrini də əhatə edir.
Bu arada etirazçılar tələbləri yerinə yetirilənədək aksiyalarını davam etdirəcəklərini bildirirlər. Onların əsas tələbləri elektrik böhranına son qoyulması, dövlət xidmətlərinin yaxşılaşdırılması, eləcə də heç bir istisna olmadan bütün siyasi qurum və strukturların devrilməsidir.