ABŞ ordusunun İraq Kürdüstanından çıxışı başlayıb

Mediada yayılan məlumatlara görə, ABŞ qüvvələrinin İraq Kürdüstanından mərhələli şəkildə çıxarılması prosesi başlayıb. Bu addım ABŞ qüvvələrinin yenidən yerləşdirilməsi və ölkənin İraqdakı genişmiqyaslı hərbi iştirakının sona çatdırılması proqramı çərçivəsində həyata keçirilir.
Əl-Ərəbiyyənin məlumatına əsasən, son günlər ABŞ hərbi karvanları Ərbil şəhərindən qonşu ölkələr istiqamətində hərəkət edib və Kürdüstan Regional İdarəsində yerləşən ABŞ bazalarından şəxsi heyət və hərbi texnikanın çıxarılmasına başlanılıb.
Məlumata görə, ABŞ qüvvələrinin çıxarılması bir neçə mərhələdə və əvvəlcədən müəyyən edilmiş vaxt cədvəlinə uyğun həyata keçiriləcək. Bununla belə, ABŞ Müdafiə Nazirliyi indiyədək son hərəkətlər, çıxarılan qüvvələrin sayı və daşınan texnikanın həcmi barədə rəsmi açıqlama verməyib.
Bu arada, Al-Monitor saytı Clash Report-a istinadən xəbər verib ki, ABŞ sentyabrın 30-u üçün müəyyən edilmiş son tarixdən əvvəl İraqda qalan qüvvələrinin çıxarılmasına başlayıb. Məlumata əsasən, ABŞ ordusu Ərbildən Patriot hava hücumundan müdafiə sistemlərini də çıxarıb.

Əl-Ərəbiyyə ABŞ-ın bölgədəki mövcudluğunun azalmasından narahatdır
Əl-Ərəbiyyə öz hesabatında qeyd edib ki, ABŞ qüvvələrinin çıxarılması prosesi bölgədə son həftələr hərbi gərginliyin artdığı bir vaxta təsadüf edir.
Telekanal yazıb:
"İranın dəstəklədiyi silahlı qrupların Kürdüstan Regional İdarəsindəki mövqelərə hücumlarını davam etdirməsi ABŞ-ın hərbi mövcudluğunun azalmasının nəticələri ilə bağlı narahatlıqları artırıb."
Bağdad və Vaşinqton koalisiya missiyasının başa çatdırılması barədə razılaşıblar
Əl-Ərəbiyyənin iddiasına görə, ABŞ qüvvələrinin çıxarılması Bağdad və Vaşinqton arasında ABŞ rəhbərliyindəki beynəlxalq koalisiyanın İraqdakı missiyasına son verilməsi ilə bağlı əvvəlki razılaşmalar çərçivəsində həyata keçirilir.
İraq və ABŞ daha əvvəl koalisiya qüvvələrinin yenidən yerləşdirilməsi və onların bəzi İraq bazalarındakı hərbi missiyalarının başa çatdırılması üçün vaxt cədvəli barədə razılığa gəlmişdilər. Bu plana əsasən, qalan bazalardan çıxış prosesi 2026-cı ildə tamamlanmalıdır.
Bununla belə, ABŞ hərbçilərinin İranla müharibənin davam etdiyi bir vaxtda İraq Kürdüstanından çıxarılmasının əvvəlcədən hazırlanmış proqramdan kənar şəkildə həyata keçirildiyi görünür.
Əl-Ərəbiyyə sonda bildirib ki, çıxış prosesinin başlamasına baxmayaraq, indiyədək neçə ABŞ hərbçisinin Kürdüstan Regionunu tərk etdiyi və nə qədər hərbi texnikanın çıxarıldığı məlum deyil. Gözlənilir ki, ABŞ qüvvələrinin yenidən yerləşdirilməsi yaxın həftələrdə də davam edəcək və Bağdadla Vaşinqton arasında razılaşdırılmış vaxt cədvəli icra olunacaq.

ABŞ Küveytdəki hərbi mövcudluğunu da yenidən nəzərdən keçirir
Ötən həftənin çərşənbə günü The Wall Street Journal qəzeti də xəbər vermişdi ki, ABŞ İrana qarşı müharibə fonunda Küveytdəki hərbi mövcudluğunun miqyasını yenidən qiymətləndirir.
Bu addım Küveyt rəsmilərinin ölkələrinin təhlükəsizliyi üçün ABŞ-ın qəti dəstəyinə hələ də ehtiyac duyduqlarını bildirdikləri bir vaxtda atılır.
The Wall Street Journal yazır ki, müharibə zamanı ABŞ-ın obyektləri və hərbi bazaları dəfələrlə İranın hücumlarının hədəfi olub.
Qəzetin hesabatında qeyd olunur ki, analitiklərin fikrincə, bu münasibətlərdə dəyişiklik yaradacaq əsas amil Vaşinqtonun artıq Küveytdə daimi və genişmiqyaslı hərbi mövcudluğun nə həyati əhəmiyyət daşıdığını, nə də hərbi baxımdan məntiqli olduğunu dərk etməsidir.