ABŞ demokratları İran müharibəsi itkilərini şübhə altına aldı

Robert Qarsiya və Suhaş Subramanyam çərşənbə axşamı rəsmi itki statistikasında baş verdiyini bildirdikləri "şübhəli dəyişiklikləri" tənqid edərək, bu məsələ ilə bağlı Pentaqondan izahat tələb ediblər.
Hər iki konqresmen həmçinin bildiriblər ki, ABŞ Nümayəndələr Palatasının Nəzarət Komitəsi İranla müharibə zamanı Amerika hərbçilərinin itkilərinin qeydə alınması və hesabatlandırılması qaydasına dair araşdırmaya başlayıb.
Bu araşdırma, İordaniya və İraqda həlak olmuş dörd amerikalı hərbçinin adının əvvəlcə İranla müharibə üzrə rəsmi itki siyahısına daxil edildiyi, lakin bir neçə gün sonra həmin siyahıdan çıxarıldığı və daha sonra "xarici əməliyyatlar" adlı yeni kateqoriya altında yenidən qeydiyyata alındığının üzə çıxmasından sonra başlanıb.
Məlumatlara görə, yeni kateqoriyanın başlanğıc tarixi 7 iyul göstərilib. Bu tarix Tramp administrasiyasının İrana qarşı yeni hərbi əməliyyatların başlandığını və Müharibə Səlahiyyətləri Qanunu əsasında yeni 60 günlük müddətin başladığını elan etdiyi günə təsadüf edir.
Demokrat konqresmenlər bu dəyişikliklərin səbəbləri, hərbi itkilərin təsnifatı ilə bağlı qaydalar və bu qərarların hüquqi əsaslarına dair sənədlərin təqdim olunmasını tələb ediblər.
Robert Qarsiya vurğulayıb ki, Pentaqon Amerika hərbçilərinin itkiləri ilə bağlı şəffaf davranmır və bildirib ki, Amerika xalqı "itirilən hər bir can və yaralanan hər bir hərbçi barədə həqiqəti bilməyə haqqı var."
Suhaş Subramanyam isə qeyd edib ki, Müdafiə Nazirliyi təsnifatları dəyişdirməklə müharibənin real dəyərini gizlətməməlidir və itkilərlə bağlı statistikanın açıqlanmasında daha çox şəffaflıq tələb edib.