İraq: koalisiya qüvvələrinin iştirakına ehtiyacımız yoxdur

İraq Prezidenti Nizar Amid bu gün, şənbə günü keçirilən görüşdə bildirib ki, ölkəsinin artıq beynəlxalq koalisiya qüvvələrinin mövcudluğuna ehtiyacı yoxdur və bu qüvvələrin İraqdan çıxarılması sentyabrın 30-da həyata keçiriləcək.
İraq Prezidenti qeyd edib ki, beynəlxalq koalisiya qüvvələri Bağdadın müraciəti əsasında İŞİD terror qruplaşmasına qarşı mübarizə aparmaq məqsədilə ölkəyə yerləşdirilmişdi. Onun sözlərinə görə, hazırda ölkədə nisbi sabitliyin təmin olunması və İraq təhlükəsizlik qüvvələrinin imkanlarının artması səbəbindən xarici koalisiya qüvvələrinin ölkədə qalmasına ehtiyac yoxdur.
Amid İraqın milli suverenliyinə toxunaraq vurğulayıb ki, ölkə ərazisindən hər hansı dövlətə qarşı təcavüz məqsədilə istifadə edilməsini qəbul etmirlər.
“Biz İraq ərazisinin başqa ölkələrə qarşı hücum platformasına çevrilməsinə icazə verməyəcəyik”, – deyə İraq Prezidenti bildirib.
İraq Prezidenti İran İslam Şurası Məclisinin sədri Məhəmməd Baqir Qalibafın İraqa son səfərinə də toxunaraq deyib ki, İran parlamentinin sədri ilə görüş zamanı iki ölkə arasındakı münasibətlərə yenidən baxılması ilə bağlı müzakirələr aparılıb və İrana müvafiq mesajlar çatdırılıb.
O, çıxışının digər hissəsində bildirib ki, hazırkı hökumət ölkənin bütün problemlərinin həlli istiqamətində fəaliyyət göstərir.
“Hazırkı hökumət iki böyük təhlükəsizlik və iqtisadi problemlə ciddi şəkildə mübarizə aparır və əsas prioritetini iqtisadi sahəyə yönəldib”, – deyə Amid qeyd edib.
İraq Prezidenti çıxışının sonunda regional müharibələrin ölkəsinə təsirlərinə toxunaraq bildirib ki, İraq digər ölkələrlə müqayisədə regiondakı münaqişələrdən daha çox zərər çəkib.
O əlavə edib ki, məhz bu səbəbdən İraq hökuməti sabitlik və neytrallıq siyasətini əsas prioritetlərindən biri kimi müəyyənləşdirib.