Qəzzada yüz minlərlə insan “şiddətli susuzluq” təhlükəsi ilə üz-üzədir

Qəzza zolağının şimalındakı bələdiyyələr su böhranının dərinləşməsinin yaratdığı ağır humanitar və sanitariya nəticələri barədə xəbərdarlıq ediblər. Onların sözlərinə görə, su və kanalizasiya sistemlərinin fəaliyyət göstərməsi üçün zəruri avadanlıqların, ehtiyat hissələrinin və yanacağın əraziyə daxil olmasına qoyulan məhdudiyyətlər vəziyyəti daha da ağırlaşdırıb.
Cəbəliyə ən-Nəzlə bələdiyyəsinin rəhbəri Mazen Nəccar Qəzza şəhərinin şimalındakı bələdiyyə sədrlərinin adından keçirdiyi mətbuat konfransında bildirib ki, İsrailin hücumları Qəzza zolağının geniş ərazilərinin simasını dəyişib, bir çox şəhər və yaşayış məhəllələri əvvəlki vəziyyətini tamamilə itirib.
Nəccar vurğulayıb ki, su böhranı hazırda Qəzza zolağının şimalında yaşayan əhalinin üzləşdiyi ən təhlükəli problemlərdən birinə çevrilib.
Onun sözlərinə görə, bələdiyyələrə məxsus generatorların təxminən 60 faizi sıradan çıxıb. Bu isə su quyularının və kanalizasiya şəbəkələrinin fəaliyyətini davam etdirmək imkanlarını ciddi şəkildə məhdudlaşdırıb. Eyni zamanda, avadanlıq və ehtiyat hissələrinin çatışmazlığı həyati əhəmiyyət daşıyan xidmətlərin göstərilməsində əsas maneələrdən birinə çevrilib.
Qəzza zolağının şimalındakı bələdiyyələr bildiriblər ki, yolların açılması, dağıntıların daşınması və tullantıların yığılması üçün zəruri texnika və avadanlıqların əraziyə buraxılmaması sanitariya vəziyyətini daha da pisləşdirib. Bunun nəticəsində xəstəliklərin, gəmiricilərin və həşəratların yayılması sürətlənib və əhali üçün əlavə təhlükələr yaranıb.
Bələdiyyələrin məlumatına görə, kanalizasiya nasoslarının əraziyə daxil olmasına qoyulan məhdudiyyət böyük həcmdə çirkab suların yığılmasına və yaşayış məntəqələrində bataqlıqların yaranmasına səbəb olub. Generatorların və onlar üçün ehtiyat hissələrinin çatışmazlığı isə su quyularının fəaliyyətini ciddi şəkildə pozub.
Bələdiyyələr qeyd ediblər ki, suyun duzsuzlaşdırılması qurğularının əraziyə daxil olmasına maneələrin yaradılması içməli su böhranını daha da dərinləşdirib və mədə-bağırsaq xəstəliklərinə yoluxma riskini artırıb. Yağın çatışmazlığı xidmət avtomobillərinin fəaliyyətini dayandırmaqla yanaşı, generator və digər texnikanın sıradan çıxmasına və yanmasına səbəb olub.
Qəzza zolağının şimalındakı bələdiyyələr vurğulayıblar ki, su borularının, kanalizasiya klapanlarının və sementin əraziyə buraxılmaması su və kanalizasiya şəbəkələrində təmir və texniki xidmət işlərinin aparılmasını mümkünsüz edib. Bu isə həmin şəbəkələrin ayrı-ayrı hissələrinin zədələnməsi və dağılması riskini artırıb.
Bununla yanaşı, bələdiyyələr İsrail qüvvələrinin Qəzza şəhərinin şimal-qərbində yerləşən Şeyx Rədvan məhəlləsindəki suyun duzsuzlaşdırılması stansiyasına hücumunu pisləyiblər. Bildirilib ki, sözügedən obyekt İsrailin hava hücumu nəticəsində dağıdılıb. Halbuki həmin ərazidə yaşayan sakinlər və məcburi köçkünlər içməli suya olan tələbatlarını mövcud məhdud imkanlar hesabına ödəməyə çalışırlar.
Bələdiyyələr bildiriblər ki, həyati əhəmiyyətli infrastrukturun hədəfə alınması və eyni zamanda onların fəaliyyəti və təmiri üçün zəruri avadanlıqların əraziyə daxil olmasına maneə yaradılması fələstinlilərin əzablarını daha da artırıb, Qəzza zolağının şimalında yaşayan yüz minlərlə insanın həyatını və ən elementar ehtiyaclarını ciddi təhlükə qarşısında qoyub.
Bələdiyyələr sonda beynəlxalq ictimaiyyətə və aidiyyəti qurumlara müraciət edərək öz məsuliyyətlərini yerinə yetirməyə çağırıblar. Onlar İsrailə təzyiq göstərilməsini və su və kanalizasiya sistemlərinin bərpası üçün zəruri maşın, avadanlıq, ehtiyat hissələri, yanacaq, yağ, nasoslar və digər materialların Qəzza zolağına daxil olmasının təmin edilməsini tələb ediblər.
Bələdiyyələrin fikrincə, bu addımlar su və kanalizasiya obyektlərinin yenidən fəaliyyətə başlaması və böhranın davam etməsinin yarada biləcəyi daha ağır humanitar və sanitariya fəsadlarının qarşısının alınması üçün təcili şəkildə atılmalıdır.