Hadi əl-Amiri: Müqavimət qrupları İraqın suverenliyinin təminatçısıdır; ABŞ hərbçiləri ölkədən çıxarılmalıdır

Əl-Amiri bazar günü Ayətullah Seyid Məhəmməd Baqir əl-Həkimin şəhadətinin ildönümü münasibətilə keçirilən mərasimdə çıxış edərək İraq hökuməti ilə müqavimət qrupları arasında qarşıdurmanın mümkün olmadığını deyib.
O bildirib: “Baş nazirin müqavimət qrupları ilə qarşıdurmaya girmək barədə qərar qəbul etməsi mümkün deyil.”
Bədr Təşkilatının baş katibi qeyd edib ki, “Koordinasiya Çərçivəsi” qüvvələri qarşıdurmanın yarada biləcəyi təhlükələrdən xəbərdardır və böhranları idarə etmək üçün kifayət qədər təcrübə və imkanlara malikdir.
Əl-Amiri silahların tənzimlənməsinin milli və qanuni məqsəd olduğunu vurğulayaraq bildirib ki, silahların tənzimlənməsi məsələsində hər hansı xarici müdaxilə və diktə qəbuledilməzdir və bu qərar tamamilə daxili iradə əsasında həyata keçirilməlidir.
O, İraqın tam suverenliyinin qorunmasının vacibliyini vurğulayıb, xarici hərbi qüvvələrin, xüsusilə ABŞ və Türkiyə hərbçilərinin ölkədən çıxarılmasını, həmçinin bütün İraq ərazilərinin, sərhəd-keçid məntəqələrinin və hava məkanının dövlətin tam nəzarətinə verilməsini tələb edib.
Əl-Amiri eyni zamanda konstitusiyaya zidd fəaliyyət göstərən və qonşu ölkələr üçün təhlükə yaradan qanunsuz silahlı qrupların tərksilah edilməsinə çağırıb.
Bədr Təşkilatının baş katibi bildirib ki, müqavimət qüvvələri ilə təhlükəsizlik strukturları ölkənin ən ağır dövrlərində eyni cəbhədə mübarizə aparıblar. Onun sözlərinə görə, müqavimətin silahı İraq hökumətinə qarşı istifadə edilməyib, əksinə, ölkənin suverenliyini müdafiə etmək məqsədi daşıyıb.
Əl-Amiri xarici hegemonluq və kənardan diktə edilməsinə qarşı çıxaraq vurğulayıb ki, İraqın təhlükəsizliyi, silah məsələsi və təhlükəsizlik sahəsində qərarların tənzimlənməsi ölkənin daxili məsələləridir və “ABŞ diktəsi dövrü artıq başa çatıb”.