Trampın İranla bağlı iddiası məsxərəyə qoyuldu

X platformasındakı «Trampın Truth Social paylaşımları» səhifəsində bildirilib ki, ABŞ hərbçilərinin yerləşdiyi obyektlərin, o cümlədən Müvəffəq əs-Səlti aviabazasının və Əqəbə yaxınlığındakı strateji mövqelərin ətrafında güclü partlayış səsləri eşidilib. Səhifə həmçinin istifadəçiləri amerikalı hərbçilər üçün dua etməyə çağırıb.
Bu iddianın yayılması sosial şəbəkə istifadəçilərinin reaksiyasına səbəb olub. İstifadəçilər Donald Trampın və onun administrasiyasının bəzi yüksək vəzifəli şəxslərinin əvvəlki açıqlamalarını xatırladaraq, Vaşinqtonun müharibə zamanı İranın hərbi potensialının məhv edilməsi ilə bağlı iddialarını şübhə altına alıblar.
Bəzi istifadəçilər kinayəli şəkildə qeyd ediblər ki, Tramp və ABŞ administrasiyasının rəsmiləri daha əvvəl İranın raket və hərbi imkanlarının ciddi şəkildə zəiflədiyini, hətta faktiki olaraq məhv edildiyini iddia edirdilər. Lakin İranın ABŞ-ın regiondakı mövqelərinə doğru ballistik raketlər atması ilə bağlı yeni məlumatların bu iddialarla ziddiyyət təşkil etdiyi vurğulanıb.
Bu ziddiyyət X sosial şəbəkəsində Tramp administrasiyasının məsxərə mövzusuna çevrilib. Xüsusilə istifadəçilər sual edirlər ki, ABŞ rəsmilərinin iddia etdiyi kimi İranın hərbi potensialı «məhv edilibsə», Tehran necə hələ də regiondakı ABŞ mövqelərinə qarşı raket zərbələri endirmək imkanına malikdir?
Məsələ Trampın İranla bağlı yeni açıqlamalarının gündəmə gəldiyi bir vaxtda baş verib. ABŞ bir tərəfdən İranla razılaşma əldə etmək üçün diplomatik səylər göstərdiyini bildirərkən, digər tərəfdən ötən gecə — bazar günü — İranın Lark adasındakı mövqelərinə zərbələr endirib.
Məlumata görə, ABŞ-ın bu addımı İran Silahlı Qüvvələrinin sərt cavabı ilə qarşılaşıb. İslam İnqilabı Keşikçiləri Korpusu (SEPAH) isə cavab olaraq İordaniyada yerləşən iki ABŞ hərbi bazasının raket və pilotsuz uçuş aparatları ilə hədəfə alındığını açıqlayıb.