شاہی مسجد تنازعہ پر مسلم فریق کی عرضی پر سپریم کورٹ میں سماعت

اسلام ٹائمز۔ سپریم کورٹ آف انڈیا میں آج متھرا کی شاہی مسجد معاملہ میں مسلم فریق کی جانب سے دائر کی گئی عرضی پر سماعت کی۔ مسلم فریق نے درخواست کی ہے کہ جن معاملوں کو ہائی کورٹ میں ٹرانسفر کر دیا گیا ہے ان کی سماعت متھرا کی عدالت میں کی جائے۔ خیال رہے کہ شاہی عیدگاہ کمیٹی نے اس معاملہ میں سپریم کورٹ میں ایس ایل پی دائر کی ہے، جس میں یہ مطالبہ کیا گیا ہے شاہی عیدگاہ مسجد سے متعلق تمام مقدمات، جنہیں سماعت کے لئے ہائی کورٹ منتقل کیا گیا ہے، کی سماعت متھرا کی عدالت میں کی جائے۔ سپریم کورٹ آف انڈیا جمعہ یعنی آج مسلم فریق کی طرف سے دائر ایس ایل پی پر سماعت کرنے جا رہا ہے۔

ہندو فریق بھی مسلم فریق کی طرف سے دائر ایس ایل پی پر سپریم کورٹ میں اپنا کیس پیش کرے گا۔ ہندو فریق چاہتا ہے کہ تمام مقدمات کی سماعت صرف ہائی کورٹ میں ہو۔ شری کرشنا جنم بھومی مکتی نیاس کے چیئرمین مہندر پرتاپ سنگھ نے کہا کہ ہائی کورٹ میں سماعت جاری رکھنے کے لئے ہندو فریق مسلم فریق کی طرف سے سپریم کورٹ میں دائر کردہ ایس ایل پی پر اعتراض کرے گا۔ متھرا سول کورٹ میں ہندو تنظیموں اور لوگوں کی درج کرائے گئے 12 سے زیادہ مقدمات زیر سماعت ہیں۔ عرضی داخل کرتے ہوئے شری کرشنا ویراجمان نے تمام مقدمات کی سماعت متھرا سے الہ آباد ہائی کورٹ منتقل کرنے کا مطالبہ کیا تھا، اس درخواست کو ہائی کورٹ نے قبول کر لیا تھا۔