صیہونی فوج کی غزہ پر 24 گھنٹوں میں 50 مقامات پر بمباری، متعدد فلسطینی شہید

اسلام ٹائمز۔ جنگ بندی معاہدے کی کوششیں تیز ہوتے ہی صیہونی فوج نے غزہ پر حملے بڑھا دیئے ہیں، 24 گھنٹوں میں 50 مقامات پر بمباری سے متعدد فلسطینی شہید ہوگئے۔ غزہ کے علاقے شجاعیہ میں کئی روز سے جاری فوجی آپریشن میں 100 فلسطینی شہید ہوچکے ہیں۔ فلسطینی گروپوں کی جانب سے شدید مزاحمت کی جا رہی ہے۔ مارٹر گولوں، راکٹوں سے حملوں میں کئی اسرائیلی فوجی ہلاک ہوگئے۔ اسرائیلی ہیلی کاپٹر کو بھی نشانہ بنایا گیا۔ ادھر مقبوضہ مغربی کنارے کے جنین کیمپ میں اسرائیلی فوج نے 7 فلسطینی شہید کر دیئے۔

اسرائیلی فوج کی لبنان میں حزب اللہ سے بھی جھڑپیں جاری ہیں۔ حزب اللہ نے 17 راکٹ حملوں میں اسرائیلی عمارتوں اور فوجی ٹھکانوں کو نشانہ بنایا۔ حماس نے غزہ میں بین الاقوامی فوج کی تعیناتی کے کسی بھی ممکنہ منصوبے کو مسترد کر دیا ہے۔ اسرائیلی خفیہ ایجنسی موساد کے سربراہ کی سربراہی میں اسرائیلی وفد قطری ثالث کاروں سے ملاقات کے بعد واپس آگیا۔ اسرائیلی حکام کا کہنا ہے کہ فریقین میں اختلافات برقرار ہیں، اسرائیلی وفد اگلے ہفتے دوبارہ بات چیت کے لیے قطر جائے گا۔