اسلام ٹائمز۔ بھارتی ریاست بہار کے سابق وزیراعلٰی لالو یادو نے پٹنہ میں آر جے ڈی کے 27ویں یوم تاسیس کی تقریب سے خطاب کیا۔ اس موقعہ پر انہوں نے کہا کہ نریندر مودی حکومت کمزور ہے، یہ اپنی کمزوریوں کی وجہ سے کسی بھی وقت گرسکتی ہے اور شاید اگلے مہینے اگست میں ہی گرسکتی ہے لہذا انتخابات کے لئے تیار رہیں۔ لالو یادو نے نتیش کمار اور جے ڈی (یو) کا نام لئے بغیر حملہ کرتے ہوئے مزید کہا ’’ہم نے اپنے بنیادی نظریے کے ساتھ کبھی سمجھوتہ نہیں کیا، ہم 2020ء کے اسمبلی انتخابات میں واحد سب سے بڑی پارٹی بن کر ابھرے لیکن اقتدار سے کچھ دور رہ گئے۔ اس موقعے پر اپنی تقریر میں سابق نائب وزیراعلٰی تیجسوی یادو نے نتیش کمار سے کہا کہ وہ مودی حکومت کے ساتھ ثابت قدم رہیں۔
تیجسوی یادو نے مزید کہا ’’ہمیں یہ دیکھ کر خوشی ہوئی کہ جے ڈی (یو) نے بہار کے خصوصی درجہ کے زمرے کے مطالبے پر ایک قرارداد پاس کی، اب جب کہ نتیش کمار دہلی میں ایک بڑے اسٹیک ہولڈر ہیں اور مودی حکومت کسی نہ کسی طرح ان پر منحصر ہے۔ انہوں نے کہا کہ نتیش کمار کو بہار کو خصوصی زمرہ کا درجہ دلانا چاہیئے اور اس بات کو یقینی بنانا چاہیئے کہ بہار کوٹہ کی حد کو آئین کے نویں شیڈول کے تحت رکھا جائے، تاکہ اسے قانونی احاطہ دیا جاسکے. تیجسوی یادو نے پارلیمانی انتخابات میں اپنی پارٹی کی کارکردگی پر کہا کہ اگرچہ ہم نے صرف چار سیٹیں جیتیں، لیکن ہمارے ووٹ کا حصہ نو فیصد بڑھ گیا ہے اور ہم نے پچھلے انتخابات میں صرف 16 کے مقابلے میں 55 اسمبلی حلقوں میں اپنے مخالفین کو پیچھے چھوڑ دیا۔