جمعیت علماء ہند نے ہاتھرس کا دورہ کیا اور حادثہ کے متاثرین کی مالی مدد کی

اسلام ٹائمز۔ جمعیت علماء ہند کے وفد نے ہاتھرس کا دورہ کیا جہاں حالیہ دنوں ایک ہندو مذہبی اجتماع میں بگھدڑ مچنے سے 121 افراد ہلاک ہوئے تھے۔ جمعیت علماء ہند کے ارکان نے متاثرین سے ملاقات کی اور ان کا حال دریافت کیا۔ اس کے علاوہ حادثے میں ہلاک ہونے والوں کے لواحقین کو فی کس 10 ہزار روپے اور زخمیوں کو فی کس 5 ہزار روپے کی مالی امداد دی گئی۔ جمعیت علماء ہند کے صدر مولانا ارشد مدنی کی ہدایت پر وفد نے واقعہ کے دوسرے دن سے ہی ہاتھرس کا دورہ کرنا شروع کر دیا۔ جمعیت کے ارکان سوکھنا گاؤں پہنچے، جہاں ایک ہی گھر کے تین افراد سمیت کل چار افراد اس حادثے میں اپنی جان سے ہاتھ دھو بیٹھے تھے۔ اس دوران انہوں نے جمعیت علماء ہند کے صدر مولانا ارشد مدنی کا پیغام بھی متاثرین کے اہل خانہ کو دیا۔ انہوں نے کہا کہ فرقہ پرست لوگ دلوں میں فاصلے پیدا کرتے ہیں، وہیں جمعیت علماء ہند دلوں کو جوڑنے کا کام کرتی ہے۔ وفد نے کہا ’’دکھ کی اس گھڑی میں ہم آپ کے ساتھ ہیں، ہم جو کچھ کر سکتے ہیں کر رہے ہیں، اللہ آپ کو یہ صدمہ برداشت کرنے کی ہمت اور حوصلہ عطا فرمائے‘‘۔

اس پر مہلوکین کے لواحقین نے آنکھوں میں آنسو لئے کہا کہ حادثے کے بعد حکومت کے علاوہ اجتماع کے منتظمین ہمارے پاس نہیں آئے اور نہ ہی کسی نے ہمیں تسلی دی۔ اس دوران مولانا ارشد مدنی نے ایک بیان میں کہا کہ جمعیت علماء ہند ایک صدی سے ملک میں محبت پھیلانے کا کام کر رہی ہے۔ انہوں نے کہا کہ جمعیت مذہب سے بالاتر ہو کر انسانیت کی بنیاد پر ریلیف اور فلاحی کام کرتی ہیں کیونکہ کوئی مصیبت یا سانحہ یہ پوچھنے سے نہیں آتا کہ کون ہندو ہے اور کون مسلمان۔ انہوں نے کہا کہ ملک میں ایسے لوگ ہیں جو لوگوں کو مذہب اور لباس سے پہچانتے ہیں۔ انہوں نے مزید کہا کہ ہم ایسے لوگوں سے کہنا چاہتے ہیں کہ آئیں اور لوگوں کو مذہب اور لباس سے پہچانیں، وہ آئیں اور دیکھیں کہ ایسے لوگوں کا کام اور کردار کیا ہے۔