اسلام ٹائمز۔ متحدہ قومی موومنٹ پاکستان نے شکایت مرکز قائم کر دیا، جہاں شہری اپنی شکایات کے اندراج اور حل کیلئے منتخب نمائندوں سے رابطہ کر سکتے ہیں۔ متحدہ قومی موومنٹ پاکستان کے مرکزی دفتر پاکستان ہاؤس میں ایم کیو ایم کنیکٹ کمپلین سینٹر کی افتتاحی تقریب کا انعقاد ہوا۔ اس سلسلے میں ایم کیو ایم پاکستان کے سینیئر مرکزی رہنما مصطفیٰ کمال نے کہا کہ ایم کیو ایم پاکستان نے آج مُلک کی سیاسی تاریخ میں ایک نئی داغ بیل کی بُنیاد رکھ دی ہے اور پورے پاکستان بالخصوص سندھ کے شہری علاقوں کو مُنفرد اور مؤثر آواز دے دی ہے۔ انہوں نے بتایا کہ ہم نے ایک شکایتی مرکز سینٹر قائم کر دیا ہے، جس پر شہری دیئے گئے نمبر 021-786-111-021 پر فون کرکے اپنی شکایات درج کرا سکیں گے اور ان کے حل کیلئے منتخب نمائندوں سے رابطہ کر سکیں گے، یہ شکایتی مرکز پورے ہفتے اور چوبیس گھنٹے کام کرے گا، ایم کیو ایم کی قیادت جدید طریقے کو استعمال کرکے اپنے منتخب نمائندوں اور ذمہ داران کی کارکردگی کو مانیٹر کرے گی۔