جنوبی لبنان پر صیہونی حکومت کی دوبارہ فوجی جارحیت

اسلام ٹائمز۔ عرب میڈیا نے جمعرات کی صبح جنوبی لبنان کے کئی علاقوں پر صیہونی حکومت کے جارحانہ فضائی حملوں کی اطلاع دی۔ اسلامی جمہوریہ ایران کے خبر رساں ادارے فارس نیوز کے مطابق جمعرات کی صبح مقامی میڈیا نے جنوبی لبنان کے علاقوں پر صیہونی حکومت کی بار بار فوجی جارحیت کی اطلاع دی۔ المنار نیٹ ورک نے ایک فوری خبر میں بتایا ہے کہ صیہونی حکومت کے جنگی طیاروں نے "رامیہ" قصبے کے اطراف کے علاقوں پر حملہ کیا۔ دوسری جانب لبنانی خبر رساں ایجنسی نے بھی لکھا ہے کہ حملہ آوروں کے طیاروں نے لبنان کے جنوب میں الخیام اور العدیسہ شہروں پر دو حملے کیے ہیں۔ "المیادین" نیٹ ورک نے یہ بھی اطلاع دی ہے کہ صہیونی توپ خانے نے "علما الشعب" قصبے کے اطراف کے علاقوں پر بمباری کی۔

ادھر امریکی حکام اور اداروں نے صیہونی حکومت کو خبردار کیا ہے کہ لبنان کی اسلامی مزاحمتی تحریک کے ساتھ بھرپور جنگ میں داخل ہونے کے نتائج بہت سنگین ہوں گے۔ 7 اکتوبر 2023ء کو مزاحمتی تحریک حماس کے جنگجوؤں کی طرف سے "طوفان الاقصیٰ" آپریشن کے آغاز کے بعد سے صیہونی غزہ کی پٹی کے علاوہ جنوبی لبنان پر توپ خانے سے اور فضائی حملے کر رہے ہیں۔ لبنان کی اسلامی مزاحمتی تحریک نے الاقصیٰ طوفان آپریشن کی حمایت میں مقبوضہ فلسطین کے شمال میں صیہونی فوجی ٹھکانوں کو بھی نشانہ بنایا ہے۔ حزب اللہ نے ہمیشہ اس بات پر تاکید کی ہے کہ یہ حملے غزہ کے عوام اور فلسطینی مزاحمتی قوتوں کی حمایت میں کیے گئے ہیں اور جب تک صیہونی حکومت کی جارحیت جاری رہے گی، یہ حملے بھی جاری رہیں گے۔