حزب اللہ کے مقبوضہ گولان میں اسرائیلی تنصیبات پر راکٹ حملے، 10 اسرائیلی ہلاک

اسلام ٹائمز۔ لبنان کی مزاحمتی تنظیم حزب اللہ کے مقبوضہ گولان میں غاصب صیہونی رجیم کی تنصیبات پر راکٹ حملے میں 10 اسرائیلی ہلاک ہوگئے، جبکہ اسرائیلی میڈیا کے مطابق حزب اللہ نے مقبوضہ گولان کے گاؤں مجدل شمس پر 40 میزائل فائر کیے، لیکن حزب اللہ نے گاوں پر حملے کی تردید کرتے ہوئے کہا ہے کہ اسرائیلی تنصیبات کو نشانہ بنایا گیا اور اسرائیلی ڈیفنس سسٹم میزائل روکنے میں ناکام رہا اور اسرائیلی ائیرڈیفنس سسٹم کئی بار حملے روکنے میں ناکام رہتا ہے، لیکن آئرن ڈوم کے انٹرسیپٹر آبادیوں پر گرتے ہیں اور جانی و مالی نقصان ہوتا ہے۔

دوسری جانب اسرائیلی وزیر خارجہ یسرائیل کاٹز نے حزب اللہ کو سخت ردعمل کی دھمکی دی۔ انہوں نے کہا کہ اس میں کوئی شک نہیں کہ حزب اللہ نے تمام ریڈ لائنز عبور کرلی ہیں۔ ان کا کہنا تھا کہ ہمیں ایک مکمل جنگ کا سامنا ہے، ہمیں اس کی قیمت چکانی پڑے گی، لیکن اسرائیل حزب اللہ سے اس سے بھی زیادہ قیمت وصول کرے گا۔ صیہونی میڈیا کے مطابق آئرن ڈوم انٹرسیپٹرز گرے اور اس وقت یہودی آبادکار میونسپلٹی عمارت کے باہر جمع تھے، جس کے نتیجے میں 10 افراد ہلاک ہوگئے، جن میں بچے بھی شامل ہیں، جبکہ 30 سے زائد افراد زخمی ہوئے۔