ریاستی ادارے پارا چنار میں دہشتگردوں کیخلاف آپریشن کریں، مرکزی انجمن امامیہ گلگت

اسلام ٹائمز۔ مرکزی انجمن امامیہ گلگت کی جانب سے جاری ایک بیان میں کہا گیا ہے کہ پارہ چنار میں شیعہ مومنین پر حملہ جس میں کئی افراد شہید اور بہت سارے زخمی ہوئے جو کہ سراسر ظلم، بربریت سفاکیت اور درندگی ہے، دہشتگردی کے یکے بعد دیگرے واقعات انتہائی تشویشناک ہیں۔ واقعے کی شدید الفاظ میں مذمت کرتے ہیں اور ساتھ ہی سازش کاروں، دہشتگردوں اور سہولتکاروں کے خلاف بھرپور کارروائی کا مطالبہ کرتے ہیں۔

دہشتگردوں کا ریاست پاکستان کے اندر مومنین پر تسلسل سے دہشتگرادانہ حملے ملک دشمن قوتوں کے آلہ کار ہونے کا واضح ثبوت ہے، جبکہ ملک کے اندر ہزاروں کی تعداد ملت جعفریہ کے شہداء کی قربانیوں کو نظر انداز کرتے ہوئے ریاست کی طرف سے دہشتگردوں کے ساتھ مذاکرات کئے جاتے ہیں جس کا کوئی خاطرخواہ نتیجہ حاصل نہیں ہوتا، حالانکہ ملت جعفریہ پاکستان نے ریاست کی بقاء اور امن و مان کی خاطر اپنے شہدا ء کے قاتلوں کے ساتھ ہونے والے مذاکرات کو بھی قبول کیا، ہونا تو یہ چا ہیے تھا کہ ملک میں امن بحال ہوتا، دہشتگردوں کا قلع قمع ہوتا مگر ایسا نہ ہوسکا۔