پوٹن کی جوہری حملے کی دھمکیاں ہمیں خوفزدہ نہیں کرسکتیں، جرمنی

اسلام ٹائمز۔ جرمن وزارت خارجہ کے ترجمان نے کہا کہ گذشتہ روز روسی صدر کی جانب سے جرمنی میں طویل فاصلے تک مار کرنے والے امریکی میزائلوں کی تعیناتی کے بارے میں انتباہ کے باوجود برلن کے موقف میں کوئی تبدیلی نہیں آئی۔ اسلام ٹائمز کے مطابق اے ایف پی نے اطلاع دی ہے کہ جرمن وزارت خارجہ کے ترجمان سیباسٹین فشر نے پیر کو یہ بات کہی کہ یورپ میں میزائلوں کی تعیناتی کے امریکی ارادے کی تصدیق کی صورت میں روسی صدر کی جانب سے درمیانی فاصلے تک مار کرنے والے جوہری ہتھیاروں کی پیداوار دوبارہ شروع کرنے کی دھمکی کے باوجود برلن کے موقف میں کوئی تبدیلی نہیں آئی۔ پوٹن کے گذشتہ روز کے بیانات کے جواب میں انہوں نے کہا کہ ہم ایسے بیانات سے نہیں ڈریں گے۔

گذشتہ روز روسی بحریہ کے دن کی تقریب میں پوٹن نے کہا کہ جرمنی کی سرزمین پر امریکی ہتھیاروں کی تعیناتی کا منصوبہ سرد جنگ کے دور کی یاد دلاتا ہے اور کہا کہ اگر یہ کارروائی امریکہ کی طرف سے کی گئی تو روس یکطرفہ طور پر مختصر اور درمیانے فاصلے تک مار کرنے والے میزائلوں کی تعیناتی کو معطل کرنے سے خود کو آزاد کر لے گا۔ اس انتباہ کا اظہار گذشتہ ہفتے واشنگٹن میں نیٹو کے سربراہی اجلاس کے موقع پر امریکہ اور جرمنی کے مشترکہ بیان کے جواب میں کیا گیا۔ امریکہ نے اس بیان میں کہا ہے کہ وہ 2026ء سے جرمنی میں طویل فاصلے تک مار کرنے والے ہتھیاروں کا نظام (جو روس تک پہنچ سکتے ہیں) دوبارہ تعینات کرنا چاہتا ہے۔ مذکورہ بیان نے روس اور مغرب کے درمیان فوجی تناؤ میں اضافے کے بارے میں خدشات کو جنم دیا ہے، جس کے بین الاقوامی سلامتی کے لیے اہم مضمرات ہیں۔