عراقی حزب اللہ کا مزاحمتی محور کیخلاف کسی بھی مہم جوئی کیصورت میں اسرائیل کو انتباہ

اسلام ٹائمز۔ عراق کی حزب اللہ نے صیہونی حکومت کو خطے میں مزاحمتی محور کی جماعتوں میں سے کسی ایک کے خلاف کسی بھی کارروائی کے بارے میں خبردار کیا ہے۔ فارس نیوز کے مطابق عراقی حزب اللہ کی فوجی بٹالین کے فوجی ترجمان نے صیہونی حکومت کو خطے کی مزاحمتی جماعتوں میں سے کسی ایک کو نشانہ بنانے والی کسی بھی مہم جوئی کے بارے میں خبردار کیا۔ جعفر الحسینی نے کہا کہ اگر اسرائیل مزاحمتی محور میں سے کسی ایک کے خلاف اپنی فوجی کارروائیوں کی حد بڑھانا چاہتا ہے تو تنازع کے نتائج اسرائیل اور اس کے شیطانی حامی امریکہ کے حق میں نہیں ہوں گے۔

ہفتے کے روز مقبوضہ گولان کے علاقے مجدل شمس میں ہونے والے دھماکے کے بعد، جس کے بارے میں صیہونی حکومت کا دعویٰ ہے کہ حزب اللہ نے اس کا ارتکاب کیا تھا، صیہونی حکومت کی سکیورٹی کابینہ نے ہفتے کے روز لبنان کی حزب اللہ کو فوجی جواب دینے کی منظوری دی۔ ادھر لبنان کی حزب اللہ نے ایک سرکاری بیان میں صہیونی میڈیا کے دعوے کو سختی سے مسترد کرتے ہوئے مجدل شمس پر حملے کی تردید کی ہے۔