تمام اسلامی ممالک کے تعاون سے مسلمانوں پر ظلم و ستم کا خاتمہ کیا جا سکتا ہے، ڈاکٹر مسعود پزشکیان

اسلام ٹائمز۔ یمن کی قومی نجات حکومت کے ترجمان "محمد عبدالسلام" اسلامی جمہوریہ ایران کے صدر کی تقریب حلف برداری میں شرکت کے لئے تہران میں موجود ہیں، جہاں انہوں نے گزشتہ شب نو منتخب صدر ڈاکٹر "مسعود پزشکیان" سے ملاقات کی۔ اس موقع پر ڈاکٹر مسعود پزشکیان نے اس امید کا اظہار کیا کہ تمام اسلامی ممالک کے باہمی اتحاد سے مسلمانوں پر مسلط ظلم و ستم کا خاتمہ کیا جا سکتا ہے۔ انہوں نے یمن و ایران کے درمیان تعلقات کو مشترکہ اور ناقابل تسخیر ثقافت و نظریات پر مبنی قرار دیا۔ انہوں نے اس بات کی وضاحت کی کہ فلسطینی عوام کی حمایت کے سلسلے میں یمن کے اقدامات نہایت اہم اور موثر تھے۔ ان اقدامات نے صیہونی رژیم اور اس کے حواریوں پر واضح دباؤ ڈالا۔ ایرانی صدر نے کہا کہ زمانے کے جابروں کے سامنے یمنی عوام کی استقامت قابل قدر اور قابل ستائش ہے۔ انہوں نے اس بات کا یقین دلایا کہ ایران و یمن کے مابین تعلقات آنے والے زمانے میں مزید مضبوط ہوں گے۔ انہوں نے کہا کہ اتحاد و یگانگت اسلامی ممالک کی طاقت کو مزید بڑھاتی ہے۔ اگر تمام اسلامی ممالک آپس میں اتفاق کر لیں تو امت مسلمہ کے دشمن اپنے منصوبوں میں ناکام ہو جائیں گے۔