شہید ہنیہ کے مقدس خون کی برکت سے قبلہ اول کی آزادی کی جدوجہد مزید تیز تر ہوگی، علامہ عارف واحدی

اسلام ٹائمز۔ شیعہ علماء کونسل پاکستان کے مرکزی نائب صدر علامہ عارف حسین واحدی نے حماس کے سیاسی ونگ کے سربراہ اور فلسطین کے سابق وزیراعظم، مجاہد اسلام شہید اسماعیل ہنیہ کی شہادت پر اپنے ردعمل میں کہا کہ صیہونی ناجائز ریاست کی درندگی کی شدید الفاظ میں مذمت کرتے ہیں، پوری دنیا جانتی ہے کہ یہ ریاست کسی عالمی قانون کی پابند نہیں، عالمی اداروں خاص طور پر اقوام متحدہ کو اس کے خلاف عملی اقدامات اٹھانے ہوں گے۔ علاوہ ازیں امت مسلمہ اور اسلامی ممالک کو متحد ہو کر اس درندگی کے مقابلے میں سٹینڈ لینا ہوگا۔ اسماعیل ہنیہ پر یہ حملہ درحقیقت امت پر حملہ ہے۔

علامہ عارف حسین واحدی نے مزید کہا کہ اگر دشمن یہ سمجھتا ہے کہ اس طرح کی کارروائیاں فلسطینیوں کی قبلہ اول کی آزادی کی جدوجہد کو روک سکتی ہیں تو یہ ان کی خام خیالی ہے، اس مقدس خون کے صدقے یہ جدوجہد ان شاء اللہ مزید تیز ہوگی۔ انھوں نے امت مسلمہ، ملت فلسطین، شہید کی فیملی اور ان کے راہ حق کے ساتھیوں کو تعزیت پیش کی۔