انشاء اللہ وہ دن آئے گا جب فلسطین سمندر سے دریا تک قائم ہو گا، شہید اسماعیل ہنیہ کی رہبر معظم سے آخری گفتگو وائرل

اسلام ٹائمز۔ ایرانی میڈیا نے قتل سے چند گھنٹے قبل حماس کے سربراہ شہید اسماعیل ہنیہ کی رہبر انقلاب اسلامی آیت اللہ سید علی خامنہ ای کے ساتھ گفتگو شیئر کی ہے۔ ایرانی میڈیا کے مطابق اسماعیل ہنیہ نے رہبر انقلاب اسلامی سے اپنی آخری گفتگو میں کہا تھا کہ جب ایک لیڈر چلا جائے گا تو دوسرا لیڈر اس کی جگہ لے لے گا، یہ دنیا کا طریقہ ہے، زندگی اور موت اللہ کے ہاتھ میں ہے۔ شہید اسماعیل ہنیہ نے رہبر انقلاب اسلامی سے کہا تھا کہ اللہ ہی ہے جو زندگی دیتا ہے اور چھین لیتا ہے، وہی ہے جو ہمیں ہنساتا ہے اور رلاتا ہے لیکن جو چیز ہمیشہ رہے گی وہ انشاء اللہ امت مسلمہ ہے، بقول شاعر اگر ایک بزرگ ہمیں چھوڑ کر چلے جائیں تو دوسرے اس کی جگہ لیں گے۔ آخری گفتگو میں حماس کے سربراہ نے رببر انقلاب اسلامی آیت اللہ سید علی خامنہ ای کے لیے دعا کی تھی خدا آپ کو لمبی عمر، سلامتی اور صحت عطا فرمائے۔ اس کے جواب میں رہبر انقلاب اسلامی سید علی خامنہ ای نے قرآن شریف کی آیہ مبارکہ کی تلاوت کرتے ہوئے شہید اسماعیل ہنیہ سے کہا تھا کہ آپ ایک ایسا چھوٹا گروپ ہیں جو ایک بڑی فوج امریکا، نیٹو، برطانیہ اور دیگر ممالک کو شکست دینے میں کامیاب ہوا ہے۔ اس موقع پر رہبر انقلاب اسلامی سید علی خامنہ ای نے مزید کہا کہ اسرائیل کو نیست و نابود کرنا ممکن ہے، انشاء اللہ وہ دن آئے گا جب فلسطین سمندر سے دریا تک قائم ہو گا۔