وزیر اعظم کا گلگت اور سکردو ایئرپورٹس کی توسیع کیلئے جامع پلان مرتب کرنے کا حکم

اسلام ٹائمز۔ وزیر اعظم شہباز شریف نے گلگت اور سکردو ایئرپورٹس کی توسیع کیلئے جامع منصوبہ مرتب کرنے کا حکم دیدیا ہے۔ وزیراعظم کو آگاہ کیا گیا ہے کہ سکردو ایئرپورٹ کی توسیع کے لیے جلد فزیبلٹی رپورٹ پر کام شروع ہو جائے گا۔ وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیرِ صدارت شعبہ ہوا بازی کی اصلاحات کے حوالے سے جائزہ اجلاس منعقد ہوا۔وزیراعظم محمد شہباز شریف نے حکم دیا کہ سکردو انٹرنیشنل ایئر پورٹ اور گلگت ایئر پورٹ کی توسیع کے حوالے سے ایک جامع لائحہ عمل مرتب کیا جائے۔شہباز شریف نے متعلقہ افسران کو یہ بھی ہدایت کی کہ ملکی ہوائی اڈوں پر بین الاقوامی پروازوں کے وقت مسافروں کو لمبے انتظار سے بچانے کے لیے دن کے اوقات میں زیادہ کاﺅنٹرز آپریٹ کیے جائیں۔