کوئٹہ، کمشنر کوئٹہ حمزہ شفقات کا شہر کا دورہ، صفائی و دیگر صورتحال کا جائزہ

اسلام ٹائمز۔ کمشنر کوئٹہ ڈویژن اور ایڈمنسٹریٹر میٹروپولیٹن کارپوریشن کوئٹہ حمزہ شفقات نے صفائی اور تجاوزات کی صورتحال کا جائزہ لینے کیلئے اندرون شہر کا اچانک دورہ کیا۔ اس موقع پر انہوں نے میٹروپولیٹین کارپوریشن کے ورکرز کو مختلف جگہوں پر کوڑا کرکٹ پھینکنے پر وارننگ جاری کی اور ہدایت کی کہ کوڑا کرکٹ مختلف جگہوں پر پھینکنے کی بجائے ایک مخصوص جگہ پر جمع کریں، تاکہ ان کو بروقت ٹھکانے لگانے میں آسانی ہو اور شہر صاف سھترا لگے۔ انہوں نے کہا کہ شہر کی خوبصورتی اور صفائی کے لئے وسیع پیمانے پر آپریشن شروع کر دیا گیا ہے۔ جس سے شہر میں صفائی کی صورتحال میں آئندہ چند دنوں میں بہتری آئے گی۔ انہوں نے کہا کہ شہر کی صفائی ستھرائی کے انتظامات کو یقینی بنایا جائے۔ ڈمپنگ سائٹ پر موجود کوڑا کرکٹ کو جلد از جلد ٹھکانے لگا کر صاف کیا جائے۔

انہوں نے کہا کہ کوئٹہ شہر میں صفائی ستھرائی کے انتظامات کو بہتر بنانے کے لیے ضروری اور ہر ممکن اقدامات اٹھائے جا رہے ہیں۔ شہر میں صفائی ستھرائی کے حوالے سے دورے جاری رکھے جائیں گے۔ شہر میں صفائی کے حوالے سے کسی بھی علاقے کو ہرگز نظرانداز نہیں کریں گے۔ صفائی ستھرائی روزانہ کا کام ہے۔ لہٰذا اس حوالے سے مستقل بنیادوں پر جامع حکمت عملی اپنانا ہوگی۔ اسکے علاوہ صفائی کے حوالے سے شہر کو مختلف زونز میں تقسیم کیا گیا ہے۔ کیونکہ زون وائز صفائی کرنے میں آسانی پیدا ہوگی اور اس سے صفائی کا معیار بھی بہتر ہوگا۔ کمشنر کوئٹہ نے کہا کہ صفائی کے حوالے سے وزیراعلیٰ بلوچستان میر سرفراز بگٹی کی ہدایات پر عمل پیرا ہیں اور اس میں کسی بھی قسم کی کوتاہی برداشت نہیں کی جائے گی۔ انہوں نے شہریوں سے بھی اپیل کی کہ اپنے گرد و نواح میں صفائی کا خاص خیال رکھیں اور کوڑا کرکٹ باہر پھینکنے کی بجائے مخصوص جگہ پر رکھیں، تاکہ ٹھکانے لگانے میں میٹروپولیٹن کارپوریشن کے عملے کو آسانی ہوسکے۔