تقریباً 19 ہزار فلسطینی بچے یتیم ہو چکے ہیں، یونیسف

اسلام ٹائمز۔ اقوام متحدہ کے بچوں کے فنڈ (یونیسف) کے ترجمان نے کہا کہ تقریبا غزہ کی پٹی میں تقریباً 19 ہزار بچے یتیم ہو چکے ہیں۔ فارس نیوز کے مطابق اقوام متحدہ کے بچوں کے فنڈ (یونیسف) کے ترجمان، "کاظم ابو خلف" نے کہا کہ غزہ کی پٹی میں وہ بچے جو جنگ میں اپنے والدین کو کھو چکے ہیں یا جنگی حالات کی وجہ سے ان کے والدین میں سے کوئی ایک ان سے دور ہو گیا ہے اور کسی دوسرے علاقے میں موجود ہے، "بے سہارا بچے" کہلاتے ہیں۔

یونیسف کے ترجمان نے آج (ہفتہ) مصری اخبار "الیوم السابع" کے ساتھ بات کرتے ہوئے کہا کہ بے سہارا بچوں کے بارے میں دیے گئے اعداد و شمار اندازوں پر مبنی ہیں اور موجودہ حالات میں صحیح تعداد کا تعین کرنا ممکن نہیں ہے۔ انہوں نے مزید کہا کہ اقوام متحدہ کے جنگی علاقوں میں تجربے کے مطابق، ایک فیصد بچے ایسے ہو سکتے ہیں جو اپنے والد، والدہ یا دونوں والدین کو کھو چکے ہوں۔

یونیسف کے ترجمان نے مزید کہا کہ غزہ کی پٹی میں 1.9 ملین پناہ گزین موجود ہیں، اس لیے اندازہ ہے کہ تقریباً 19 ہزار بچے بے سہارا ہیں یعنی یا تو وہ جنگ میں یتیم ہو چکے ہیں یا جنگی حالات کی وجہ سے ان کے والدین میں سے کوئی ایک ان سے دور ہو گیا ہے۔ کاظم ابو خلف نے اس انٹرویو کے اختتام پر یاد دلایا کہ یہ اعداد و شمار تخمینی ہیں اور تجربے پر مبنی ہیں۔

اسرائیلی فوج نے گزشتہ 10 ماہ سے غزہ کی پٹی کو محاصرے میں لے رکھا ہے اور اس علاقے میں ہزاروں عمارتوں کو بمباری سے تباہ کر دیا ہے۔ عالمی انتباہات کے باوجود، اسرائیل کی حکومت صرف محدود انسانی امداد کو غزہ کی پٹی میں داخل ہونے کی اجازت دیتی ہے۔ اب تک اسرائیلی حملوں میں 40 ہزار 300 سے زائد فلسطینی شہید ہو چکے ہیں اور غزہ کی وزارت صحت نے بتایا ہے کہ زیادہ تر شہداء میں خواتین، بچے اور بزرگ شامل ہیں۔